నర్సంపేట నియోజకవర్గంలో అభివృద్ధి పనులకు శంకుస్థాపనలువిద్యుత్ ఉపకేంద్రం, గ్రామపంచాయతీ, మహిళా సంఘం భవన నిర్మాణాలకు శ్రీకారం

నర్సంపేట, అక్టోబర్ 17: నర్సంపేట నియోజకవర్గంలో గ్రామీణ మౌలిక సదుపాయాల అభివృద్ధికి మరో ముందడుగు పడింది. నియోజకవర్గ పరిధిలోని వివిధ గ్రామాల్లో చేపట్టనున్న అభివృద్ధి పనులకు ఎమ్మెల్యే దొంతి మాధవరెడ్డి శంకుస్థాపనలు చేశారు. నెక్కొండ మండలం దీక్షకుంట్ల గ్రామంలో 33/11 కేవీ విద్యుత్ ఉపకేంద్రం, ఖానాపురం మండలం బాలు తండాలో గ్రామపంచాయతీ భవనం, ధర్మారావుపేట గ్రామంలో మహిళా సంఘం భవన నిర్మాణ పనులకు ఆయన శ్రీకారం చుట్టారు.

రైతులకు మెరుగైన విద్యుత్ సేవలు

నెక్కొండ మండలం దీక్షకుంట్ల గ్రామంలో తెలంగాణ రాష్ట్ర విద్యుత్ పంపిణీ సంస్థ ఆధ్వర్యంలో నిర్మించనున్న 33/11 కేవీ విద్యుత్ ఉపకేంద్రానికి ఎమ్మెల్యే శంకుస్థాపన చేశారు. ఈ ఉపకేంద్రం అందుబాటులోకి వస్తే పరిసర గ్రామాల ప్రజలకు, రైతులకు విద్యుత్ సరఫరా మెరుగుపడటంతో పాటు వ్యవసాయానికి నాణ్యమైన విద్యుత్ అందించేందుకు దోహదపడుతుందని పేర్కొన్నారు. స్థానికంగా విద్యుత్ సమస్యలను తగ్గించి ప్రజలకు మెరుగైన సేవలు అందించడమే లక్ష్యమని తెలిపారు.

బాలు తండాలో రూ.20 లక్షలతో పంచాయతీ భవనం

ఖానాపురం మండలం బాలు తండాలో రూ.20 లక్షల వ్యయంతో నిర్మించనున్న గ్రామపంచాయతీ భవనానికి ఎమ్మెల్యే దొంతి మాధవరెడ్డి శంకుస్థాపన చేశారు. నూతన భవనం నిర్మాణంతో గ్రామపంచాయతీ పరిపాలనకు అవసరమైన వసతులు అందుబాటులోకి రానున్నాయి. గ్రామస్థులకు ప్రభుత్వ సేవలను మరింత చేరువ చేసేందుకు ఈ భవనం ఉపయోగపడనుంది.

మహిళా సంఘం భవనానికి రూ.10 లక్షలు

ధర్మారావుపేట గ్రామంలో రూ.10 లక్షల నిధులతో నిర్మించనున్న మహిళా సంఘం భవనానికి ఎమ్మెల్యే శంకుస్థాపన చేశారు. ఈ సందర్భంగా ఆయన మాట్లాడుతూ మహిళలు ఆర్థికంగా అభివృద్ధి సాధించి, స్వయం సమృద్ధి దిశగా ముందుకు సాగేందుకు మహిళా సంఘాలు కీలక పాత్ర పోషిస్తున్నాయని అన్నారు. మహిళలు సంఘటితంగా ఉంటూ ప్రభుత్వం కల్పిస్తున్న అవకాశాలను సద్వినియోగం చేసుకోవాలని సూచించారు. మహిళా సంఘాల సమావేశాలు, ఇతర అభివృద్ధి కార్యక్రమాల నిర్వహణకు ప్రత్యేక భవనం ఎంతో ఉపయోగకరంగా ఉంటుందని పేర్కొన్నారుగ్రామీణ ప్రాంతాల్లో మౌలిక సదుపాయాల కల్పనతో పాటు మహిళల సంక్షేమానికి ప్రాధాన్యం ఇస్తున్నట్లు తెలిపారు.ఈ కార్యక్రమాల్లో ప్రజాప్రతినిధులు, విద్యుత్ శాఖ అధికారులు, కాంగ్రెస్ పార్టీ నాయకులు, కార్యకర్తలు, మహిళా సంఘాల సభ్యులు, గ్రామస్తులు పాల్గొన్నారు.