భారత్ మరోసారి అంతరిక్ష రంగంలో చరిత్ర సృష్టించింది

భారత వైమానిక దళ గ్రూప్ కెప్టెన్ శుభాంశు శుక్లా యాక్సియం మిషన్-4 లో భాగంగా బుధవారం (జూన్ 25, 2025) మధ్యాహ్నం 12:01 గంటలకు (IST) అంతరిక్షంలోకి విజయవంతంగా దూసుకెళ్లారు.

అమెరికా సంయుక్త రాష్ట్రాలలోని ఫ్లోరిడాలో ఉన్న నాసా కెన్నెడీ స్పేస్ సెంటర్‌లోని లాంచ్ కాంప్లెక్స్ 39A నుంచి స్పేస్‌ఎక్స్ ఫాల్కన్ 9 రాకెట్‌పై కొత్త స్పేస్‌ఎక్స్ డ్రాగన్ అంతరిక్ష నౌక ద్వారా ఈ మిషన్ ప్రారంభమైంది. ఈ చారిత్రక యాత్రలో శుభాంశు శుక్లాతో పాటు మరో ముగ్గురు వ్యోమగాములు అంతర్జాతీయ అంతరిక్ష కేంద్రం కు చేరుకున్నారు. 

రెండో మానవ అంతరిక్ష యాత్ర 

ఈ మిషన్‌కు అమెరికా మాజీ నాసా వ్యోమగామి, యాక్సియం స్పేస్‌లో హ్యూమన్ స్పేస్‌ఫ్లైట్ డైరెక్టర్ అయిన పెగ్గీ విట్సన్ నాయకత్వం వహిస్తున్నారు. శుభాంశు శుక్లా ఈ మిషన్‌లో పైలట్‌గా వ్యవహరిస్తుండగా, హంగరీకి చెందిన టిబోర్ కపు, పోలాండ్‌కు చెందిన స్లావోజ్ ఉజ్నాన్స్కీ-విస్నియేవ్స్కీ మిషన్ స్పెషలిస్టులుగాఉన్నారు. ఈ మిషన్ భారతదేశం, పోలాండ్, హంగరీలకు 40 సంవత్సరాల తర్వాత తమ రెండో మానవ అంతరిక్ష యాత్ర కాగా, ISSకు తొలి ప్రభుత్వ స్పాన్సర్డ్ మిషన్‌గా చారిత్రక ప్రాధాన్యతను సంతరించుకుంది.

వందే మాతరం..

శుభాంశు శుక్లా ఈ మిషన్‌లో భారతదేశ జాతీయ గీతం.. వందే మాతరం వినడం ద్వారా తన యాత్రను ప్రారంభించారు. ఇది దేశభక్తిని ప్రతిబింబించిందని చెప్పవచ్చు. ఈ మిషన్ భారత్ గగన్ యాన్ కార్యక్రమంతో సమన్వయం కలిగి ఉంది. ఇది భారతదేశం స్వతంత్ర మానవ అంతరిక్ష యాత్ర కార్యక్రమం కాగా, 1984లో రాకేష్ శర్మ తర్వాత శుభాంశు శుక్లా రెండో భారతీయ వ్యోమగామిగా ISSకు చేరుకున్నారు. ఇది భారత అంతరిక్ష రంగంలో ఒక అరుదైన ఘనతగా చెబుతున్నారు నిపుణులు.

ఎన్ని రోజులు ఉంటారు..

స్పేస్‌ఎక్స్ డ్రాగన్ అంతరిక్ష నౌక గురువారం (జూన్ 26, 2025) ఉదయం 7:00 గంటలకు (EDT) / సాయంత్రం 4:30 గంటలకు (IST) ISS హార్మొనీ మాడ్యూల్‌లోని స్పేస్ ఫేసింగ్ పోర్ట్‌కు ఆటోమేటిక్‌గా డాక్ చేయనుంది. ఈ మిషన్‌లోని నలుగురు వ్యోమగాములు 14 రోజుల పాటు ISSలో ఉండి, వివిధ శాస్త్రీయ ప్రయోగాలు, విద్యా కార్యక్రమాలు, వాణిజ్య కార్యకలాపాలను నిర్వహిస్తారు. శుభాంశు శుక్లా ISRO రూపొందించిన 7 ప్రయోగాలతో పాటు, నాసా హ్యూమన్ రీసెర్చ్ ప్రోగ్రామ్‌లో భాగంగా 5 సహకార అధ్యయనాలలో పాల్గొంటారు.

ఇతర దేశాలు కూడా..

ఈ మిషన్‌లో భాగంగా 31 దేశాల నుంచి 60 శాస్త్రీయ అధ్యయనాలు చేస్తున్నారు. ఇందులో భారతదేశం, అమెరికా, యూరప్, సౌదీ అరేబియా, బ్రెజిల్ వంటి దేశాలు ఉన్నాయి. ఈ విజయం ద్వారా భారతదేశం తన అంతరిక్ష సామర్థ్యాన్ని ప్రపంచానికి చాటిచెప్పడమే కాకుండా, అంతర్జాతీయ సహకారాన్ని మరింత బలోపేతం చేయనుంది. ఈ మిషన్ అనేక సవాళ్లను అధిగమించి చివరకు ప్రారంభమైంది. ఫాల్కన్ 9 రాకెట్‌లో లిక్విడ్ ఆక్సిజన్ లీక్, ISSలోని జ్వెజ్డా సర్వీస్ మాడ్యూల్‌లో ఒత్తిడి లీక్ కారణంగా ఈ మిషన్ జూన్ 10, జూన్ 19, జూన్ 22 తేదీలలో ఆలస్యమైంది. నాసా, రోస్‌కాస్మోస్ సంయుక్తంగా ఈ సమస్యలను పరిష్కరించి, జూన్ 25న ఈ లాంచ్‌కు ఆమోదం తెలిపాయి.